大律師公會話冇聽過「核心保安區」，噉佢地乜都識架嘛，冇聽過噉一地喺假嘢。佢地上知天文，下知地理，入得廚房，出得廳堂，上得．．．堂，無所不知，無所不曉。以後百萬富翁要問人答案，緊係搵大律師啦。
唔可以唔刊憲就設立禁區架，好似以前飛虎隊突然去圍剿果啲悍匪，拉禁區唔俾啲記者接近噉，事先咪刊咗憲，公佈哂先囉．．．大律師冇出聲，一定係有啦！
「核心保安區」唔應該設立嘅，因為唔啱法律。就算啲人掟香蕉、掟通渠水、著炸彈背心行埋去啲政要攪大爆炸、或者好似挪威噉揸支槍四圍掃、疆獨揸車撞埋人群再斬人噉，都冇辦法，最緊要合法，死都抵。
警方啲保安區，阻住市民出入，唔好架。 80後、90後、社民連、人民力量佢地衝出馬路，阻塞交通幾個鐘又唔同喎，點解？你投訴80後、90後、社民連、人民力量，有鬼用，呢個世界，好佬怕爛佬，你要守規矩，人地唔駛。而且佢地心口寫住「民主」兩個字或者「平反六四」四個字，邊果敢阻？簡直係阻我者死，好過通行証。
啲學生要行果條路，要俾佢地行嘅，因為佢地得幾個人，又冇攻擊性，而且，啲學生肯定已經調查過，俾佢地過咗去，唔會有其他人話唔公平，要跟住過去架，其他上百上千嘅 80 後、90後、社民連、人民力量事後唔會出聲，話警方唔公平架。果幾個學生，一定唔會凈係諗自己而唔諗其他影響嘅，大學生嘛，好叻架嘛。
以後唔好設保安區啦，到時等總理、副總理去搵大律師、記者見吓面，等佢地表現出香港唔會有恐怖襲擊嘅呢一片神奇福地，證明唔係香港人自己嘅集體妄想。
